Missione

Per ciò chì tocca à u trafficu, Bastia hè u primu portu isulanu.
Assicureghja u portu di Bastia  60% di u trafficu marittimu tutale di a Corsica (venenu cumpresi i passaghjeri è e mercanzie).

E 4 missione di primura sò:

 

Gestisce

Gestisce a CCI a cuncessione di u Portu di Bastia dapoi u 1920. Finu à u 2005 era una cuncessione di attrazzu publicu, dapoi u 1mu di ghjennaghju di u 2006 si tratta di una cuncessione di delegazione di serviziu publicu, rinnuvata da a Cullettività Territuriale di Corsica (dispone di’ssa cumpetenza chì appartenia à u Statu dapoi u 2005) per un tempu di 15 anni. Assicureghja u cuncessiunariu a gestione di u duminiu publicu à l’indrentu di u spaziu chì li hè statu cuncessu. E missione soie sò queste : a realizazione, u mantenimentu, u rinnovu, a sfruttera, u sviluppu è a prumuzione di l’attrazzi, terreni, casamenti, stallazione, materiali, rete è servizii chì abbisognanu à u funziunamentu di u portu. 

Accoglie

Ùn smette a Camera di Cummerciu di megliurà e cundizione di accolta di i passaghjeri è di i veiculi. Per riesce ci, urganizeghja a gestione di i flussi, ch’ellu si tratti di i veiculi o di i passaghjeri pedoni.
Hè per quessa ch’ella mette in opera servizii, infrastrutture è soprastrutture cum’è questi : terminali marittimi, parcheghji, spazii adumbrati cù funtane è vapurizadori di acqua, una navetta gratisi, un spaziu d’infurmazione, attrazzi di messaghjeria varievule per a signaletica….
S’imprimureghja oghje a CCI di accinghje u portu da ammestrà megliu a gestione di i flussi, cunformu à a messa in anda di e missione di sicurezza ch’ella li tocca à appiegà.

Prumove

U sviluppu di u trafficu rispundendu à e brame di ogni operadore, è di modu particulare, à quelle di e cumpagnie marittime. 

Fighjà voltu l’avvene

Appruntendu prugrammi d’investimentu (2015-2020) à parte si da e previsione di u trafficu è di l’evuluzione di e flotte.
Prupunendu assesti novi à cortu andà.
Riflettendu à e vie di sviluppu : linee nove, traffichi novi, crucere…

Sicurezza


Cuntrolli di Sicurezza à l’imbarcu

Appruntate u vostru titulu di trasportu (bigliettu) è u vostru ducumentu d’identità per u cuntrollu di sicurezza è u cuntrollu cummerciale, ponu principià questi 2 ora prima di a partenza di a nave.
Impone u codice internaziunale ISPS à l’inseme di e strutture purtuarie di fà un cuntrollu di sicurezza per ogni passaghjeru (pedoni o cù mezi di trasportu) chì si prisenta per l’imbarcu. 

U persunale di sicurezza faranu di modu sistematicu un cuntrollu di accessu (verifica di u titulu di trasportu) è una ispezzione visuale (à nantu à u passaghjeru, i so bagagli è/o u so veiculu). È po, pò accade ch’ellu sia sottumessu u passaghjeru à una ispezzione filtrera, vene à dì una verifica di più precisa di i so bagagli è/o di u so veiculu, cunformu à e prescrizzione di i regulamenti attuali.

Li tuccherà à i passaghjeri à appruntà i so tituli di trasportu è i so ducumenti d’identità da aghjevulisce i cuntrolli di sicurezza. Deveranu tene cun elli l’inseme di’ssi ducumenti s’elli volenu parte, mentre una stonda, u spaziu di sicurezza purtuaria.

U Pianu VIGIPIRATE hè attivu oghje in u portu di Bastia.

Livellu in anda oghje: “Sicurezza rinfurzata – risicu attentatu”